Jamen Bond လုပ်ရင် မိန်းမကလက်မထပ်ဘူး ဆိုလို့ James Bond မလုပ်ခဲ့တဲ့ Liam Neeson
James Bond | ဖေဖော်ဝါရီ ၂၁၊ ၂၀၂၃
◼ အက်ရှင်ရုပ်ရှင်တွေနဲ့ပိုပြီးရေပန်းစားတဲ့ မင်းသားကြီး Liam Neeson ဟာ နာမည်ကျော်ဇာတ်ကောင်တစ်ခုဖြစ်တဲ့ James Bond ဖြစ်လာဖို့အတွက် အခွင့်အရေးရခဲ့ဖူးပါတယ်။
◼ Liam Neeson ကို ၁၉၉၅ ထုတ် James Bond ရုပ်ရှင် GoldenEye မှာ James Bond အဖြစ်ပါဝင်ဖို့ကမ်းလှမ်းကြပေမယ့်လည်း Liam Neeson က ငြင်းခဲ့ပါတယ်။
◼ James Bond နေရာကိုငြင်းခဲ့ရတဲ့အကြောင်းအရင်းကို Liam Neeson က The Rolling Stone သတင်းနဲ့အင်တာဗျူးတစ်ခုမှာ အခုလိုမျိုးမှတ်ချက်ပေးပြောပြလာပါတယ်။
"ကျွန်တော် ကာရိုလိုင်းနားမှာ Nell ရိုက်ကူးရေးလုပ်နေရတုန်းက ကျွန်တော့်ချစ်ဇနီး၊ သူ့ဝိညာဥ်ကို ဘုရားသခင်ကောင်းချီးပေးပါစေဗျာ၊ ကျွန်တော့်ကိုပြောလာတာရှိတယ်။ သူကပြောတယ်ဗျ 'Liam, ရှင့်ကိုပြောစရာရှိတယ်၊ ရှင် James Bond လုပ်လို့ကတော့ ရှင့်ကိုကျွန်မလက်မထပ်နိုင်ဘူးနော်။' တဲ့ဗျာ။ ကျွန််တော်သူ့ကို လက်ညှိုးကိုသေနတ်ပုံစံလုပ်၊ ပါးစပ်ကနေ James Bond တီးလုံး ပါးစပ်ဆိုင်းနဲ့ သူ့နောက်ကနေသွားသွားစတတ်ဖူးတယ်ဗျ။ အဲလိုစရတာသောက်ရမ်းကြိုက်ခဲ့တာဗျ။ James Bond ကိစ္စကို သူတော်တော်ပြင်းပြင်းထန်ထန်ရာဇသံပေးထားတာပေါ့နော်။ နိုင်ငံပေါင်းစုံက မိန်းမချောမိန်းမလှလေးတွေနဲ့ အိပ်ယာထဲမှာဝင်လိုက်ထွက်လိုက်ဖြစ်ရမှာဆိုတော့လည်း ဖြစ်သင့်တာပါပဲလေ။"
◼ Liam Neeson ဟာ ကွယ်လွန်သွားပြီဖြစ်တဲ့ သူ့ရဲ့ဇနီးသည် Natasha Richardson ရဲ့ တောင်းဆိုချက်ကြောင့် James Bond ဖြစ်ခွင့်ကို လက်လွှတ်လိုက်တာပါ။
◼ Liam Neeson နဲ့ Natasha Richardson တို့ဟာ ၁၉၉၄၊ ဇူလိုင်လထဲမှာလက်ထပ်ခဲ့ကြတာဖြစ်ပြီး Nell ရုပ်ရှင်ရိုက်ကူးရေးဟာ ၎င်းတို့ရဲ့လက်ထပ်ပွဲမတိုင်ခင်မှာပြုလုပ်နေတာပါ။ အဲဒီအချိန်မှာပဲ James Bond ထုတ်လုပ်သူတစ်ယောက်ဖြစ်တဲ့ Barbara Broccoli နဲ့ James Bond အဖွဲ့သားတွေဟာ GoldenEye အတွက် Liam Neeson ကို ကမ်းလှမ်းခဲ့တာဖြစ်ပြီး Liam Neeson ဟာ အဲဒီကမ်းလှမ်းချက်ကိုငြင်းခဲ့တာဖြစ်ပါတယ်။
◼ Natasha Richardson ဟာ ၂၀၀၉ ခုနှစ်မှာ နှင်းလျှောစီးမှုမတော်တဆဖြစ်မှုကြောင့် ဦးခေါင်းပြင်းထန်ဒဏ်ရာရရှိပြီး အဲဒီဒဏ်ရာကြောင့်ပဲကွယ်လွန်ခဲ့ရတာဖြစ်ပါတယ်။ Natasha Richardson ကွယ်လွန်ချိန်မှာတော့ Liam Neeson နဲ့ Natasha Richardson တို့ဟာ အိမ်ထောင်သက် ၁၆ နှစ် သက်တမ်းရှိခဲ့ပြီဖြစ်ပါတယ်။
◼ Liam Neeson ဟာ ယနေ့အထိ အိမ်ထောင်သစ်မထူထောင်ပဲ သားနှစ်ယောက်နဲ့ ဘဝကိုဖြတ်သန်းနေပါတယ်။
ပုံစာ - Natasha Richardson နှင့် Liam Neeson တို့ ဇနီးမောင်နှံအားတွေ့ရစဥ်
Ref: Insider Entertainment
McGarrett ရေးသည်။
0 Comments