Irrfan Khan ကွယ်လွန်ခြင်း သုံးနှစ်ပြည့်

Irrfan Khan ကွယ်လွန်ခြင်း သုံးနှစ်ပြည့်

ဧပြီ ၂၉၊ ၂၀၂၃။

◼ ဘောလိဝုဒ်ရဲ့ Khan တွေထဲမှာ ပရိသတ်တွေအရမ်းကြိုက်ကြတဲ့ Khan တစ်ယောက်ရှိခဲ့ဖူးတယ်။ Shah Rukh Khan, Salman Khan, Aamir Khan ဆိုတဲ့ Khan သုံး Khan ထက် ပိုပြီး ပရိသတ်အချစ်ကိုခံရဖူးတဲ့ Khan တစ်ယောက် ရှိခဲ့ဖူးတယ်။ အဲဒီ Khan က Irrfan Khan ပါပဲ။

◼ လွန်ခဲ့တဲ့သုံးနှစ်က ဒီလိုနေ့ ဧပြီ ၂၉၊ ၂၀၂၀ မှာ Irrfan Khan တစ်ယောက် neuroendocrine ကင်ဆာရောဂါကြောင့် သူ့ကိုချစ်တဲ့ပရိသတ်တွေကိုထားခဲ့ပြီး လောကကြီးကနေ ထွက်ခွာခဲ့ရတယ်။ 

◼ Irrfan Khan က ဘောလိဝုဒ်ရဲ့ method actor တွေထဲကတစ်ယောက်။ နာမည်ကြီးလှပါချည်ရဲ့ ဆိုတဲ့ Nawazuddin Siddiqui ထက် ပိုပြီးအသက်ဝင်တဲ့မင်းသားတစ်ယောက်။ Irrfan ရဲ့ ရုပ်ရှင်တွေအများစုမှာ Irrfan ရဲ့ မျက်လုံးအကြည့်တွေ၊ စကားပြောဟန်ဆိုဟန်တွေက အသက်ဝင်လွန်းခဲ့တယ်။ The Lunchbox, Hindi Medium, Talvar, Billu, Life in a... Metro, Angrezi Medium ဒီရုပ်ရှင်တွေကိုပြန်ကြည့်တိုင်း Irrfan မရှိတော့တာ ဘောလိဝုဒ်ရဲ့ကံဆိုးခြင်းတစ်ခုပဲလို့တွေးမိတာပါပဲ။ Star Kids တွေ၊ Kapoor တွေ၊ Khan တွေရဲ့ မှောက်လိုမှောက် လှန်လိုလှန်အ​ခြေအနေတွေမှာ Irrfan လို သရုပ်ဆောင်တစ်ယောက်ရှိခဲ့ဖူးတယ်ဆိုတာက အိပ်မက်တစ်ခုလိုပါပဲ။

◼ ဟောလိဝုဒ်မှာလည်း Irrfan တစ်ယောက် နေရာတစ်ခုရခဲ့တယ်။ Life of Pi, Slumdog Millionare, Jurassic World, The Amazing Spider-Man တွေမှာ Irrfan တစ်ယောက် ရတဲ့နေရာမှာအကောင်းဆုံးတွေပဲလုပ်ပြခဲ့တယ်။ Irrfan မရှိတော့ဘူးဆိုတဲ့သတင်းက ဟောလိဝုဒ်မှာလည်း အနည်းငယ်ရိုက်ခတ်ခဲ့တာပါပဲ။ 

◼ Irrfan ကို ကျွန်တော်စသိခဲ့တာ Billu ဆိုတဲ့ comedy drama မှာ စသိခဲ့တာပါ။ ရုပ်ရှင်မင်းသားတစ်ယောက်နဲ့သူငယ်ချင်းဖြစ်ခဲ့ဖူးတယ် ဆိုတဲ့ ရွာထဲက ဆံသဆရာတစ်ယောက်အနေနဲ့ Irrfan ကို စသိခဲ့တယ်။ အဲဒီကနေစပြီး Irrfan Khan ကို သဘောကျခဲ့တာပါပဲ။

◼ Irrfan Khan မရှိတော့ဘူးဆိုတာ သုံးနှစ်တောင်ရှိခဲ့ပြီ။ Bollywood ကတော့ လက်တွေ့ကျကျသရုပ်ဆောင်မှုတွေရှားသွားပြီး remake တွေပေါများနေဆဲပါပဲ။ Hindi Medium လို၊ The Lunchbox လို လက်တွေ့ကျကျနဲ့ ရုပ်ရှင်အရသာပေးနိုင်တဲ့ရုပ်ရှင်မျိုးတွေကို Irrfan တစ်ယောက် ဘောလိဝုဒ်အတွက် အမှတ်တရချန်ထားပေးခဲ့တယ်.....

McGarrett ရေးသည်။