Michael Mann ရဲ့ Heat 2 ထုတ်လုပ်ဖို့အတွက် Warner Bros. မှ ဆွေးနွေးညှိနှိုင်းလျက်ရှိ
ဧပြီ ၄၊ ၂၀၂၃။
◼ ဟောလိဝုဒ်က ဝါရင့်သရုပ်ဆောင်တွေဖြစ်တဲ့ Robert DeNiro, Al Pacino နဲ့ Val Kilmer တို့ ပါဝင်ထားပြီး ဝါရင့်ဒါရိုက်တာတစ်ယောက်ဖြစ်တဲ့ Michael Mann ရိုက်ကူးခဲ့တဲ့ ၁၉၉၅ ထုတ် crime action ရုပ်ရှင် Heat ဟာ အက်ရှင်ပရိသတ်တွေကြားမှာရေပန်းစားခဲ့တဲ့ရုပ်ရှင်တစ်ကားဖြစ်ပါတယ်။
◼ ဆယ်စုနှစ်နှစ်ခုကျော်ကြာမြင့်ပြီးတဲ့နောက်မှာ Heat ဟာ နောက်ထပ် Heat 2 ဆိုတဲ့ ရုပ်ရှင်တစ်ကား ထပ်မံထွက်ရှိဖို့အလားအလာတွေဖြစ်ပေါ်လာနေပါတယ်။ Heat 2 ဟာ ၂၀၂၂ သြဂုတ်လထဲမှာ ဝတ္ထုအနေနဲ့ထွက်ရှိခဲ့ပြီးဖြစ်ပေမယ့် ယခုအခါမှာတော့ ရုပ်ရှင်အဖြစ်ပါထုတ်လုပ်ဖို့အတွက် Warner Bros. ဘက်က စီစဥ်နေပုံပါပဲ။
◼ Heat 2 ရုပ်ရှင်ထုတ်လုပ်ဖို့အတွက် Warner Bros. ရဲ့ အကြီးပိုင်းတွေဟာ ဆွေးနွေးဆဲအနေအထားမှာရှိနေပြီး Heat 2 မှာ အဓိကဇာတ်ကောင်ဖြစ်တဲ့ Neil McCauley လူငယ်ဗားရှင်းကို သရုပ်ဆောင် Adam Driver က ပါဝင်သရုပ်ဆောင်ဖို့အတွက် ညှိနှိုင်းနေကြောင်း Deadline သတင်းအရသိရပါတယ်။ ၁၉၉၅ ရုပ်ရှင်မှာ Neil McCauley အဖြစ် Robert DeNiro က သရုပ်ဆောင်ခဲ့တာပါ။ လက်ရှိမှာ Adam Driver ဟာ Michael Mann ရဲ့ Ferrari ရုပ်ရှင်မှာ အဓိကနေရာကနေပါဝင်ထားပါတယ်။
◼ Heat 2 ဝတ္ထုမှာ timeline နှစ်ခု ပါဝင်ထားပြီး ပထမ timeline ကတော့ Val Kilmer ရဲ့ Chris Shiherlis ဇာတ်ကောင်ဟာ Al Pacino ရဲ့ ဇာတ်ကောင် စုံထောက် Vincent Hanna ရဲ့ လိုက်လံဖမ်းဆီးမှုကနေတိမ်းရှောင်ဖို့ထွက်ပြေးရာကနေ အရှေ့တောင်အာရှရဲ့ရွှေတြိဂံဒေသကိုရောက်သွားပြီး အင်အားပြန်လည်ထူထောင်တဲ့အကြောင်းဖြစ်ပါတယ်။ ဒုတိယ timeline ကတော့ Robert DeNiro ရဲ့ Neil McCauley နဲ့ Val Kilmer ရဲ့ Chris Shiherlis တို့ရဲ့ ငယ်ဘဝကာလ ၁၉၈၈ မှာ ကြုံခဲ့ရတဲ့အဖြစ်အပျက်တွေနဲ့ Al Pacino ရဲ့ Vincent Hanna တစ်ယောက် ဒုစရိုက်ဂိုဏ်းတစ်ခုကိုလိုက်လံဖမ်းဆီးရတဲ့အကြောင်းကိုပြသထားပါတယ်။
◼ Heat 2 ရုပ်ရှင်နဲ့ပတ်သက်ပြီး Warner Bros. နဲ့ Michael Mann တို့ဘက်က တရားဝင်အတည်ပြုခြင်းမရှိသေးပါဘူး။
◼ ဒါရိုက်တာ Michael Mann ရဲ့ Heat ဟာ crime ရုပ်ရှင်တွေထဲမှာ နာမည်ကျော်ကြားတဲ့ရုပ်ရှင်တစ်ကားဖြစ်ပြီး ဒါရိုက်တာ Christopher Nolan ရဲ့ The Dark Knight က ဇာတ်ဝင်ခန်းတချို့မှာ Heat ရဲ့ ဇာတ်ဝင်ခန်းတချို့ကို ပြန်လည်ကိုးကားထားပါသေးတယ်။
Ref: Deadline
McGarrett ရေးသည်။
0 Comments