RRR မင်းသား Jr. NTR နဲ့ အလုပ်အတူတူလုပ်ချင်ကြောင်း ဒါရိုက်တာ James Gunn ပြောလာ
ဧပြီ ၂၇၊ ၂၀၂၃။
◼ ၂၀၂၂ က ထွက်ရှိခဲ့တဲ့ ဒါရိုက်တာ S.S. Rajmouli ရဲ့ Telugu စကားပြော အိန္ဒိယတောင်ပိုင်းရုပ်ရှင် RRR (Rise Roar Revolt) ဟာ အိန္ဒိယမှာသာမက ဟောလိဝုဒ်အထိပါပေါက်ရောက်ခဲ့ပြီး အော်စကာဆုတစ်ဆုကိုရရှိခဲ့ပါတယ်။
◼ RRR ဟာ ဟောလိဝုဒ်က James Cameron, James Gunn, Scott Derrickson စတဲ့ ဒါရိုက်တာအများအပြားရဲ့ချီးကျူးမှုကိုလဲရရှိခဲ့သလို ဒါရိုက်တာ S.S. Rajmouli ဟာလည်း ဟောလိဝုဒ်ရဲ့အေဂျင်စီတစ်ခုဖြစ်တဲ့ CAA နဲ့လည်း ကန်ထရိုက်ချုပ်ဆိုခွင့်ရခဲ့ပါတယ်။
◼ RRR သရုပ်ဆောင်တွေဖြစ်ကြတဲ့ Jr. NTR နဲ့ Ram Charan တို့ဟာ ယခုအခါမှာတော့ ဟောလိဝုဒ်ရဲ့အာရုံစိုက်မှုကိုစတင်ရရှိလာနေပြီဖြစ်သလို MCU ရုပ်ရှင် Guardians of the Galaxy သုံးကားတွဲရဲ့ဒါရိုက်တာ James Gunn ဟာ Jr. NTR နဲ့ အလုပ်အတူတူလုပ်ချင်မိကြောင်းပြောပြလာပါတယ်။
◼ Jr. NTR နဲ့ အလုပ်အတူတူလုပ်ချင်ကြောင်းကို James Gunn က News 18 နဲ့ အင်တာဗျူးတစ်ခုမှာ အခုလိုမှတ်ချက်ပေးလာပါတယ်။
"RRR ထဲကတစ်ယောက်ဗျာ အဲတစ်ယောက်အတော်မိုက်တယ်။ နာမည်ဘယ်သူပါလိမ့်၊ မနှစ်ကနာမည်ကြီးသွားတဲ့ RRR ထဲကပါပဲ။ ကျားတွေ အကောင်တွေ လှောင်အိမ်ထဲကနေထွက်လာတဲ့အထဲက တစ်ယောက်ဗျာ။ အဲဒီတစ်ယောက်နဲ့ တစ်ချိန်ကျရင်တော့ အလုပ်အတူတူလုပ်ချင်တယ်။ အရမ်းမိုက်တာ။"
◼ Jr. NTR ကို ဘယ်ဇာတ်ကောင်နေရာမှာသရုပ်ဆောင်စေချင်လဲဆိုတာကိုမေးလာတဲ့အခါမှာတော့ James Gunn က "မသိဘူးဗျ၊ စဥ်းတော့စဥ်းစားရမယ်။ အချိန်တော့နည်းနည်းယူရမယ်။" လို့ ပြောလာပါသေးတယ်။ James Gunn ဟာ DC Studios ရဲ့ CEO တစ်ယောက်လည်းဖြစ်တဲ့အတွက် Jr. NTR ကို DC မှာ ထည့်သွင်းလာမလားဆိုတာကတော့ စောင့်ကြည့်ရမှာပါပဲ။
◼ ဒါ့အပြင် မေ ၅၊ ၂၀၂၃ မှာ ရုံတင်ပြသမယ့် Marvel ရုပ်ရှင် Guardians of the Galaxy: Vol.3 ဟာ ဘောလိဝုဒ်နဲ့ အိန္ဒိယရုပ်ရှင်တွေကိုအခြေတည်ပြီးဖန်တီးခဲ့ကြောင်း၊ ဘောလိဝုဒ်ဟာ ဖျော်ဖြေရေးနဲ့အနုပညာသပ်သပ်ကိုပဲအဓိကထားပြီး စံသတ်မှတ်ချက်မရှိကြောင်း James Gunn က ပြောလာပါသေးတယ်။
◼ James Gunn ဟာ DC Universe သစ်ရဲ့ ပထမဆုံး Superman ရုပ်ရှင် Superman: Legacy ကိုလည်း တာဝန်ယူရိုက်ကူးသွားမှာပါ။
◼ Jr. NTR ရဲ့ Telugu ရုပ်ရှင်သစ် NTR 30 (တရားဝင်အမည်မသတ်မှတ်ရသေး) ဟာ ဧပြီ ၅၊ ၂၀၂၄ မှာ ရုံတင်ပြသမှာဖြစ်ပြီး ဇာတ်လမ်း၊ ဇာတ်ညွှန်း၊ ဒါရိုက်တာနေရာတွေကို Mahesh Babu ရဲ့ Bharat Ane Nenu ဒါရိုက်တာ Koratala Siva က တာဝန်ယူထားပါတယ်။ NTR 30 ဟာ ပင်လယ်နောက်ခံဇာတ်လမ်းအမျိုးအစားဖြစ်ပြီး Bollywood သရုပ်ဆောင်တွေဖြစ်ကြတဲ့ Saif Ali Khan နဲ့ Janhvi Kapoor တို့ ပါဝင်ထားပါတယ်။
◼ ဒါ့အပြင် Bollywood က YRF Spy Universe ရဲ့ ရုပ်ရှင်သစ်တစ်ကားဖြစ်တဲ့ Hrithik Roshan ရဲ့ War 2 မှာလည်း Jr. NTR က ဗီလိန်အဖြစ်ပါဝင်သွားဦးမှာပါ။
ပုံစာ - Jr. NTR (ဝဲဘက်)၊ James Gunn (ယာဘက်)။
Ref: NDTV
McGarrett ရေးသည်။
0 Comments