The Gray Man 2 အ​ကြောင်း Russo ညီနောင် ဘာပြောလဲ

The Gray Man 2 အ​ကြောင်း Russo ညီနောင် ဘာပြောလဲ

ဧပြီ ၂၁၊ ၂၀၂၃။

◼ ဒါရိုက်တာ Joe Russo နဲ့ Anthony Russo ဟာ Amazon Prime အတွက် Citadel ဆိုတဲ့ စပိုင်အက်ရှင်ဇာတ်လမ်းတွဲတစ်ခုကိုရိုက်ကူးထုတ်လုပ်ပေးထားတာဖြစ်ပြီး နောက်ထပ် Citadel နဲ့ ပတ်သက်တဲ့ နိုင်ငံတကာ spin-off ဇာတ်လမ်းတွဲတွေကိုလည်း ထုတ်လုပ်ဖို့ပြင်ဆင်နေပါတယ်။

◼ ပြီးခဲ့တဲ့နှစ်ကထွက်ခဲ့တဲ့ Russo ညီနောင်ရဲ့ Netflix အက်ရှင်ရုပ်ရှင် The Gray Man ဟာ ပရိသတ်အားပေးမှုကိုအများအပြားရရှိခဲ့သလို နောက်ထပ် sequel ဖြစ်တဲ့ The Gray Man 2 ထွက်ရှိဖို့လည်း တရားဝင်အတည်ပြုထားပြီးဖြစ်ပါတယ်။ ဒါပေမယ့် The Gray Man 2 နဲ့ ပတ်သက်ပြီး Ryan Gosling ပြန်လည်ပါဝင်သရုပ်ဆောင်မယ်ဆိုတာကလွဲလို့ ကျန်တဲ့တစ်စုံတစ်ခုကိုမှ ထုတ်ပြထားခြင်းမရှိသေးတဲ့အတွက် ပရိသတ်တွေက The Gray Man 2 နဲ့ ပတ်သက်ပြီးသိချင်နေကြပါတယ်။

◼ လန်ဒန်မြို့မှာကျင်းပတဲ့ Citadel ဇာတ်လမ်းတွဲရဲ့ပွဲဦးထွက်အကြိုပြသပွဲမှာ Russo ညီနောင်ထဲက Joe Russo က The Gray Man 2 နဲ့ ပတ်သက်ပြီး အကြောင်းအရာသစ်တချို့ကို Collider သတင်းနဲ့အင်တာဗျူးကနေတစ်ဆင့် အခုလိုပြောလာပါတယ်။

"အဲဒါက အခုလုပ်လက်စရဲ့ အလည်တည့်တည့်မှာရောက်နေတယ်။ The Gray Man 2 ဇာတ်ညွှန်းရေးသားမှုက တစ်ဝက်ကိုရောက်နေပြီ။ ထပ်ပြောရရင် ဇာတ်လမ်းကအဓိကပဲ။ အဲတော့ ကျွန်တော်တို့အခုကြိုးစားနေတယ်၊ နောက်ထပ်ခင်ဗျားတို့ကိုပြချင်တာတွေလည်းရှိတယ်။"

◼ The Gray Man 2 ဟာ ဇာတ်ညွှန်းရေးသားဆဲအဆင့်မှာရှိနေကြောင်း Joe Russo က အတည်ပြုပေးခဲ့တာပါ။

◼ The Gray Man ဟာ စာရေးဆရာ Mark Greaney ရဲ့ ၂၀၀၉ ထုတ် ဝတ္ထု The Gray Man ကို ပြန်လည်ရိုက်ကူးထားတာဖြစ်ပြီး Ryan Gosling, Chris Evans, Ana De Armas နဲ့ Jessica Henwick တို့အပြင် အိန္ဒိယ က တောင်ပိုင်းတမီလ်သရုပ်ဆောင် Dhanush တို့ ပါဝင်ထားပါတယ်။

Ref: Collider

McGarrett ရေးသည်။