ရိုက်ကူးရေးပြီးဆုံးကြောင်းကြေညာလာတဲ့ Hellboy: The Crooked Man ရုပ်ရှင်

ပုံစာ - Hellboy: The Crooked Man Comic မှ ပြကွက်တစ်ခု

ရိုက်ကူးရေးပြီးဆုံးကြောင်းကြေညာလာတဲ့ Hellboy: The Crooked Man ရုပ်ရှင်

မေ ၁၆၊ ၂၀၂၃။

◼ Millienium Media ကုမ္ပဏီဟာ Dark Horse Comic ရဲ့ နာမည်ကြီးဇာတ်ကောင်တစ်ခုဖြစ်တဲ့ Hellboy ကို Hellboy: The Crooked Man ဆိုတဲ့ R-rated အမျိုးအစား reboot ရုပ်ရှင်သစ်တစ်ကားကို ထုတ်လုပ်ပြသသွားတော့မှာဖြစ်ပါတယ်။

◼ Hellboy: The Crooked Man ကို ၂၀၀၈ ထုတ် သုံးအုပ်တွဲ comic ​ဖြစ်တဲ့ Hellboy: The Crooked Man ကို ကောက်နှုတ်ရိုက်ကူးသွားမှာဖြစ်ပြီး ဇာတ်လမ်းဇာတ်ညွှန်းကို Hellboy Comic ဖန်တီးသူ Mike Mignola နဲ့ Chris Golden တို့က ရေးသားပေးသွားမှာဖြစ်သလို Marvel ရုပ်ရှင် Ghost Rider: Spirit of Vengeance ရဲ့ ဒါရိုက်တာ Brian Taylor က တာဝန်ယူရိုက်ကူးပေးသွားမှာဖြစ်ပါတယ်။

◼ ယခုအခါမှာတော့ Hellboy: The Crooked Man ဟာ ရိုက်ကူးရေးပြီးစီးသွားပြီဖြစ်ပါတယ်။ ရိုက်ကူးရေးပြီးဆုံးပြီဖြစ်ကြောင်းကို Hellboy: The Crooked Man ရဲ့ ဇာတ်လမ်းဖန်တီးသူ Mike Mignola က ပြီးခဲ့တဲ့နေ့မှာပဲ ၎င်းရဲ့ တရားဝင် Instagram စာမျက်နှာကနေတစ်ဆင့် တရားဝင်ကြေညာခဲ့တာပါ။ ရိုက်ကူးရေးပြီးဆုံးကြောင်းကြေညာခဲ့ပေမယ့်လည်း ပြသရက်ကိုတော့ထုတ်ဖော်ပြောပြလာခြင်းမရှိပါဘူး။

◼ R-rated အမျိုးအစားဖြစ်လာမယ့် Hellboy: The Crooked Man ရုပ်ရှင်ဟာ ယခင် Hellboy ရုပ်ရှင်တွေထက် ပိုမိုကြောက်စရာကောင်းကာ ငယ်ရွယ်တဲ့ Hellboy ပုံစံကို တွေ့မြင်ရဖွယ်ရှိပါတယ်။ ဇာတ်လမ်းသဘောကတော့ ၁၉၅၀ ကာလကိုဇာတ်အိမ်ယူထားပြီး Hellboy နဲ့ BRPD အေးဂျင့်လူသစ်တစ်ယောက်ဟာ The Crooked Man ဆိုတဲ့သူ ဦးဆောင်တဲ့ စုန်းအဖွဲ့တစ်ဖွဲ့ကိုတွေ့ရှိသွားပြီး တိုက်ခိုက်ကြတဲ့အကြောင်းကိုတွေ့ရမှာပါ။

◼ Baywatch နဲ့ Deadpool 2 သရုပ်ဆောင် Jack Kesy ဟာ Hellboy နေရာကနေ ပါဝင်သွားမှာဖြစ်ပါတယ်။

Ref: Collider

McGarrett ရေးသည်။