လက်ရောက်အကြမ်းဖက်မှုနဲ့ သရုပ်ဆောင် Jonathan Majors အဖမ်းခံရ

လက်ရောက်အကြမ်းဖက်မှုနဲ့ သရုပ်ဆောင် Jonathan Majors အဖမ်းခံရ

မတ် ၂၆၊ ၂၀၂၃။

◼ Creed III နဲ့ Marvel ရုပ်ရှင် Ant-Man & the Wasp: Quantumania တို့မှာ ပါဝင်ခဲ့တဲ့ သရုပ်ဆောင် Jonathan Majors ဟာ အသက် ၃၀ အရွယ်အမျိုးသမီးတစ်ဦးအပေါ် လက်ရောက်အကြမ်းဖက်မှုကျူးလွန်တယ် ဆိုတဲ့ စွဲချက်နဲ့ ယမန်နေ့ကပဲ အမေရိကန်နိုင်ငံ၊ နယူးယောက်ခ်မြို့မှာ အဖမ်းခံခဲ့ရပါတယ်။

◼ နယူးယောက်ခ်ရဲဌာနရဲ့ ထုတ်ပြန်ချက်တစ်စောင်အရ အဆိုပါအမျိုးသမီးက သူဟာ Jonathan Majors ရဲ့ လက်ရောက်အကြမ်းဖက်မှုကိုခံခဲ့ရကြောင်း တိုင်ကြားပြောဆိုခဲ့တာဖြစ်ပြီး ဦးခေါင်းနဲ့လည်ပင်းမှာ အသေးစားထိခိုက်ဒဏ်ရာများရရှိခဲ့တဲ့အတွက် ဆေးရုံတက်ကုသမှုခံယူခဲ့ရကြောင်း သိရပါတယ်။

◼ Jonathan Majors ရဲ့ အကျိုးဆောင်တွေဘက်ကတော့ အဆိုပါထုတ်ပြန်ချက်အကြောင်းအရာကိုငြင်းဆိုထားပါတယ်။ "သူအမှားလုပ်မထားပါဘူး။ သူ့နာမည်ကိုပြန်ရှင်းဖို့နဲ့ ဒီကိစ္စကိုရှင်းဖို့ကျွန်တော်တို့လုပ်နေပါတယ်။" လို့ Jonathan Majors ရဲ့ ပြောရေးဆိုခွင့်ရှိသူဘက်က မှတ်ချက်ပေးထားပါတယ်။

◼ ရဲသတင်းများအရ ဒေသစံတော်ချိန် နံနက် ၁၁ နာရီ ၁၄ မိနစ်ခန့်မှာ အရေးပေါ်ဖုန်းခေါ်ဆိုမှုကိုရခဲ့ကြောင်းသိရပါတယ်။ ရဲဘက်သတင်းထုတ်ပြန်ချက်များအရ Jonathan Majors ကို လည်ပင်းညှစ်မှု၊ လက်ရောက်အကြမ်းဖက်မှုနဲ့ အနိုင်ကျင့်ပြုမူမှုတို့နဲ့ အမှုဖွင့်စွဲဆိုထားနိုင်ဖွယ်ရှိနေပါတယ်။

◼ ဖမ်းဆီးမှုကိစ္စနဲ့ပတ်သက်ပြီး နယူးယောက်ခ်ရဲတစ်ဦးကတော့ အခုလိုမှတ်ချက်ပြုထားပါတယ်။

"ကနဦးစုံစမ်းချက်အရ ၃၃ နှစ် အရွယ် အမျိုးသားတစ်ဦးနဲ့ ၃၀ အရွယ် အမျိုးသမီးတစ်ဦး အိမ်တွင်းရေးကိစ္စအငြင်းပွားကြတယ်။ ကျူးလွန်ခံရသူက သူဟာအကြမ်းဖက်ခံရပါတယ်လို့ ရဲကိုတိုင်ထားတယ်။ ရဲတွေက အဲဒီ ၃၃ နှစ် အရွယ် အမျိုးသားကို ရုန်းရင်းဆန်ခတ်မဖြစ်ရပဲ ဖမ်းဆီးထိန်းသိမ်းထားတယ်။ ကျူးလွန်ခံရသူက လည်ပင်းနဲ့ဦးခေါင်းမှာ ထိခိုက်ဒဏ်ရာအသေးစားရရှိထားပြီး ဆေးရုံမှာ တည်ငြိမ်တဲ့အနေအထားနဲ့ထားထားပါတယ်။"

◼ Jonathan Majors ဟာ ဒီဇင်ဘာ ၈ မှာ ရုံတင်မယ့် Magazine Dreams ရုပ်ရှင်မှာပါဝင်ထားသလို Amazon Prime မှာ ပြသမယ့် Da Understudy မှာလည်း ပါဝင်ဖို့ရှိပါသေးတယ်။

Ref: Variety

Sub-Zero ရေးသည်။