ဇာတ်လမ်းတည်ဆောက်ဆဲဖြစ်နေတဲ့ Chloé Zhao ရဲ့ Dracula ရုပ်ရှင်

ဇာတ်လမ်းတည်ဆောက်ဆဲဖြစ်နေတဲ့ Chloé Zhao ရဲ့ Dracula ရုပ်ရှင်

ဧပြီ ၂၂၊ ၂၀၂၃။

◼ Marvel ရုပ်ရှင် Eternals ရဲ့ ဒါရိုက်တာ Chloé Zhao ဟာ နာမည်ကျော်သွေးစုပ်ကောင်ဒရာကူလာရုပ်ရှင်တစ်ကားကို ဒါရိုက်တာနေရာကနေ တာဝန်ယူရိုက်ကူးသွားမှာဖြစ်ကြောင်း ပြီးခဲ့တဲ့ ၂၀၂၁ ထဲမှာ တရားဝင်ကြေညာအတည်ပြုခဲ့ပါတယ်။

◼ Chloé Zhao ရဲ့ ဒရာကူလာရုပ်ရှင်ဟာ ပုံမှန်ဒရာကူလာရုပ်ရှင်တွေနဲ့မတူညီပဲ အနာဂတ်ပုံစံ သိပ္ပံဆန်ဆန် ဗန်ပိုင်းယားရုပ်ရှင်တစ်ကားဖြစ်ကြောင်း အဲဒီအချိန်ကသတင်းများအရသိရပါတယ်။ အဲဒီအချိန်ကနေစတင်ပြီး Chloé Zhao ရဲ့ ဒရာကူလာရုပ်ရှင်ဟာ သတင်းအစအနထွက်ပေါ်လာခြင်းမရှိသေးပါဘူး။

◼ ပြီးခဲ့တဲ့ ၂၀၂၂ မှာ ဒရာကူလာနဲ့ဆက်စပ်ဇာတ်ကောင်တစ်ခုဖြစ်တဲ့ Mina Harker အကြောင်းကိုရိုက်ကူးမယ့် ဒရာကူလာရုပ်ရှင်တစ်ကား ရုတ်တရက်ဖျက်သိမ်းခံလိုက်ရပါတယ်။ အဲလိုဖျက်သိမ်းခံရပြီးတဲ့နောက်မှာ ပရိသတ်တွေက Chloé Zhao ရဲ့ဒရာကူလာရုပ်ရှင်လည်း ဖျက်သိမ်းခံရပြီလားဆိုပြီး စတင်စိတ်ပူလာနေကြပါတယ်။

◼ The Hollywood Reporter သတင်းနဲ့ Chloé Zhao တို့ရဲ့ မတ်လထုတ် သီးသန့်အင်တာဗျူးဆောင်းပါးတစ်ပုဒ်အရ ဒရာကူလာရုပ်ရှင်ဟာ ဖျက်သိမ်းခံရခြင်းမရှိပဲ ဇာတ်လမ်းရေးသားဆဲအဆင့်မှာရှိနေသေးကြောင်း Chloé Zhao က အတည်ပြုလာခဲ့ပါတယ်။ အဲဒီ ဒရာကူလာရုပ်ရှင်နဲ့ပတ်သက်ပြီး Chloé Zhao ​က "ဟုတ်ကဲ့၊ ကျွန်မအဲဒီကားအတွက် ဇာတ်ညွှန်းရေးနေပါတယ်။" လို့ မှတ်ချက်ပြုခဲ့တာပါ။

◼ ဒရာကူလာရုပ်ရှင်နဲ့ပတ်သက်ပြီး နောက်ထပ်တစ်စုံတစ်ရာသတင်းအတည်ပြုခဲ့ခြင်းမရှိပေမယ့်လည်း ပရိသတ်တွေကြားမှာတော့ Chloé Zhao ရဲ့ ဒရာကူလာမှာ မင်းသား Robert Pattinson ပါဝင်သွားမယ်ဆိုပြီး ကောလာဟလတစ်ခုထွက်ပေါ်နေပါသေးတယ်။

◼ ၂၀၂၃ ထဲမှာ ဒရာကူလာနဲ့ပတ်သက်ပြီး Renfield နဲ့ The Last Vouyage of Demeter ဆိုတဲ့ ရုပ်ရှင်နှစ်ကားထွက်လာမှာဖြစ်ပါတယ်။ Renfield ကတော့ ရုံတင်ဆဲအနေအထားရှိနေပြီး The Last Vouyage of Demeter ကတော့ သြဂုတ် ၁၄ မှာ ရုံတင်သွားမှာပါ။ 

Ref: The Hollywood Reporter 

McGarrett ရေးသည်။