DCU ရုပ်ရှင်သစ် Swamp Thing ကို James Mangold မှ ဇာတ်လမ်းရေးသားရိုက်ကူးသွားမယ်

DCU ရုပ်ရှင်သစ် Swamp Thing ကို James Mangold မှ ဇာတ်လမ်းရေးသားရိုက်ကူးသွားမယ်

ဧပြီ ၈၊ ၂၀၂၃။

◼ Ford vs Ferrari, The Wolverine, Logan နဲ့ Indiana Jones and the Dial of Destiny တို့ကို ရိုက်ကူးခဲ့တဲ့ ဒါရိုက်တာ James Mangold ဟာ လက်ရှိမှာ ပရောဂျက်များစွာကို တာဝန်ယူထားရပါတယ်။

◼ James Mangold ဟာ ဒီကနေ့ အင်္ဂလန်နိုင်ငံ၊ လန်ဒန်မြို့မှာကျင်းပတဲ့ Star Wars Celebration Europe ကို တက်ရောက်လာရင်းနဲ့ Collider သတင်းဌာနနဲ့ အင်တာဗျူးတစ်ခုမှာ DC Studios ရဲ့ DC ရုပ်ရှင်သစ်တစ်ကားဖြစ်တဲ့ Swamp Thing နဲ့ Star Wars ရုပ်ရှင်တစ်ကားအတွက် ဇာတ်လမ်းရေးသားပေးနေလျက်ရှိကြောင်း တရားဝင်အတည်ပြုလာခဲ့ပါတယ်။

◼ အဆိုပါအင်တာဗျူးမှာ James Mangold က DC ရုပ်ရှင်သစ် Swamp Thing အတွက် ဇာတ်လမ်းရေးသားပေးနေလျက်ရှိကြောင်း အခုလိုအတည်ပြုလာပါတယ်။

"အမှန်ကတော့ ကျွန်တော်အခုနှစ်ကားစလုံးကိုရေးနေတာဗျ၊ ဘာတွေဆက်ဖြစ်မလဲ၊ ဘယ်ဟာအရင်လာမလဲ၊ ဘယ်ဟာနောက်မှလာမလဲ ဆိုတာကတော့ ဘယ်သူသိမှာလဲဗျာ။ အဲတော့ ကိစ္စကဒီလို ကျွန်တော် Swamp Thing ကို ဇာတ်လမ်းရေးပေးနေတယ်၊ ခင်ဗျားတို့သိချင်တာဒါပဲ။ ကောလာဟလမဟုတ်ဘူး၊ တကယ်ဖြစ်နေတာ၊ လိုင်းပေါ်မှာပါတင်ပေးမယ်။"

◼ Swamp Thing ရဲ့ ဇာတ်လမ်းနဲ့ပတ်သက်ပြီး James Mangold ရဲ့ မှတ်ချက်ကို DC Studios က ပူးတွဲ CEO တစ်ယောက်ဖြစ်တဲ့ James Gunn ကလည်း သူ့ရဲ့ Twitter စာမျက်နှာကနေတစ်ဆင့် အခုလိုထပ်မံအတည်ပြုပေးခဲ့ပါသေးတယ်။

"DCU အတွက် လမ်းကြောင်းဆွဲဖို့အတွက် ပထမဆုံးကျွန်တော်ဆွေးနွေးတဲ့လူတွေထဲမှာ Swamp Thing ကို ဇာတ်လမ်းရေး ရိုက်ကူးပေးဖို့အတွက် တကယ်ထူးချွန်ထက်မြက်တဲ့ James Mangold လည်း ပါတာပေါ့ဗျာ။"

◼ James Gunn ရဲ့ Twitter ပို့စ်အရ Swamp Thing ကို James Mangold ကနေ ဇာတ်လမ်းအပြင် ဒါရိုက်တာနေရာကနေပါတာဝန်ယူရိုက်ကူးပေးမှာဖြစ်ကြောင်းသိရပါတယ်။

◼ ၂၀၂၃ ဖေဖော်ဝါရီလမှာကြေညာခဲ့တဲ့ DCU အသစ်ရဲ့ ပထမအဆင့် Chapter 1: Gods and Monsters ထဲက ပရောဂျက်ဆယ်ခုထဲမှာ Swamp Thing လည်း အပါအဝင်ဖြစ်ပြီး Chapter 1: Gods and Monsters ရဲ့ အဆုံးသတ်ရုပ်ရှင်လည်းဖြစ်ပါတယ်။ Swamp Thing ရဲ့ ပြသရက်ကိုတော့ မသိရသေးပါဘူး။ 

Ref: Collider

McGarrett ရေးသည်။