Horror ရုပ်ရှင် The Conjuring 4 ရဲ့ တရားဝင်နာမည်ထုတ်ပြန်လာ

Horror ရုပ်ရှင် The Conjuring 4 ရဲ့ တရားဝင်နာမည်ထုတ်ပြန်လာ

ဧပြီ ၂၆၊ ၂၀၂၃။

◼ ဧပြီ ၂၄ ကနေ ၂၇ အထိ အမေရိကန်နိုင်ငံ၊ လက်စ်ဗီးဂတ်စ်မြို့က Ceasers Palace Hotel မှာ ကျင်းပတဲ့ ရုပ်ရှင်ရုံပိုင်ရှင်များနှင့်ထုတ်လုပ်သူများဆိုင်ရာသီးသန့်ပွဲတော် CinemaCon 2023 မှာ ဟောလိဝုဒ်ရဲ့ နာမည်ကျော်ရုပ်ရှင်ထုတ်လုပ်ဖြန့်ချိရေးကုမ္ပဏီတစ်ခုဖြစ်တဲ့ WarnerBros. က ရုပ်ရှင်ကားပေါင်းများစွာကိုမိတ်ဆက်ပြသလာပါတယ်။

◼ CinemaCon 2023 မှာ WarnerBros. ဘက်က မိတ်ဆက်လာတဲ့ရုပ်ရှင်တွေထဲမှာ နာမည်ကျော် horror franchise တစ်ခုဖြစ်တဲ့ The Conjuring ရဲ့ ရုပ်ရှင်သစ်နှစ်ကားကိုမိတ်ဆက်လာပါတယ်။ Storm Reid နဲ့ Taissa Farmiga တို့ရဲ့ The Nun 2 နဲ့ Patrick Wilson နဲ့ Vera Farmiga တို့ရဲ့ The Conjuring 4 တို့ကို မိတ်ဆက်လာတာပါ။

◼ ပရိသတ်တွေစောင့်နေကြတဲ့ Conjuring 4 ရဲ့ တရားဝင်နာမည်ဟာ "The Conjuring: Last Rites" ဖြစ်ကြောင်း CinemaCon 2023 မှာ အတည်ပြုပေးလာခဲ့တာပါ။

◼ The Conjuring: Last Rites မှာ Patrick Wilson နဲ့ Vera Farmiga တို့ ပြန်လည်ပါဝင်လာမှာဖြစ်ပြီး ဇာတ်ညွှန်းကိုတော့ The Conjuring: The Devil Made Me Do It ရဲ့ ဇာတ်ညွှန်းဆရာ David Leslie Johnson-McGoldrick က ရေးသားပေးသွားမှာဖြစ်ပေမယ့်လည်း ဒါရိုက်တာရွေးချယ်မှုနဲ့ပြသရက်ကိုတော့မသိရသေးပါဘူး။

◼ ၂၀၂၃ နှစ်ဦးပိုင်းမှာ Conjuring: Last Rites ဟာ Conjuring Franchise ရဲ့ နောက်ဆုံးရုပ်ရှင်ဖြစ်လာနိုင်ကြောင်း သတင်းထွက်လာခဲ့သလို ပြီးခဲ့တဲ့ရက်ပိုင်းကလည်း Conjuring ကို ဇာတ်လမ်းတွဲအဖြစ်ဖန်တီးသွားမယ်ဆိုတဲ့သတင်းအရ Conjuring: Last Rites ဟာ Conjuring Franchise ရဲ့ နောက်ဆုံးရုပ်ရှင်ဖြစ်နိုင်ချေပိုမိုများပြားနေပါတယ်။

◼ Conjuring franchise ရုပ်ရှင်တစ်ကားဖြစ်တဲ့ The Nun 2 နဲ့ ပတ်သက်ပြီး CinemaCon 2023 မှာ Taissa Farmiga ရဲ့ စစ်စတာ Irene ဇာတ်ကောင်၊ Storm Reid ရဲ့ ဇာတ်ကောင်တစ်ခုနဲ့ The Nun 2 ရဲ့ အဓိကဇာတ်ကောင် မကောင်းဆိုးဝါး Valak တို့ ပါဝင်တဲ့ ဗွီဒီယိုကလစ်တစ်ခုကိုပြသခဲ့ပါတယ်။ The Nun 2 ကို The Conjuring: The Devil Made Me Do It ရဲ့ ဒါရိုက်တာ Michael Chaves က ရိုက်ကူးထားတာဖြစ်ပြီး M3GAN ဇာတ်ညွှန်းဆရာမ Akela Cooper က ရေးသားထားကာ လာမယ့် စက်တင်ဘာ ၈၊ ၂၀၂၃ မှာ ရုံတင်ပြသမှာပါ။

◼ The Conjuring franchise ဟာ လက်တွေ့ဘဝမှာတကယ်ရှိခဲ့တဲ့ ပရလောကဆိုင်ရာကျွမ်းကျင်ပုဂ္ဂိုလ်တွေဖြစ်တဲ့ Ed နဲ့ Lorrane Warren တို့ လင်မယားအကြောင်း ဇာတ်အိမ်ဖွဲ့ရိုက်ကူးထားတာဖြစ်ပါတယ်။ The Conjuring, The Conjuring 2, The Conjuring: The Devil Made Me Do It: Annabelle, Annabelle: Creation, Annabelle Comes Home, The Nun နဲ့ The Curse of La Llorona ဆိုပြီး စုစုပေါင်း ၈ ကား ထွက်ရှိထားပါတယ်။

Ref: Collider

McGarrett ရေးသည်။