Part 3 ထပ်ထွက်လာဖွယ်ရှိနေတဲ့ Duty After School ဇာတ်လမ်းတွဲ

Part 3 ထပ်ထွက်လာဖွယ်ရှိနေတဲ့ Duty After School ဇာတ်လမ်းတွဲ

ဧပြီ ၂၉၊ ၂၀၂၃။

◼ TVING ရုပ်သံလိုင်းကနေပြသခဲ့တဲ့ ကိုရီးယားဇာတ်လမ်းတွဲ Duty After School ဟာ မြန်မာ K-Drama ပရိသတ်တွေကြားမှာ နာမည်ကြီးနေတဲ့ဇာတ်လမ်းတွဲတစ်ခုဖြစ်ပါတယ်။

◼ အပိုင်း ၁၀ ပိုင်းပါဝင်တဲ့ Duty After School ကို Part 1 နဲ့ Part 2 နှစ်ခုခွဲပြသခဲ့တာဖြစ်ပြီး Part 1 ကို မတ် ၃၁၊ ၂၀၂၃ မှာ ပြသခဲ့သလို Part 2 ကို ဧပြီ ၂၁၊ ၂၀၂၃ မှာ ပြသခဲ့တာပါ။ Part 1 မှာတော့ အားပေးမှုနဲ့ချီးကျူးမှုတွေရခဲ့ပေမယ့်လည်း Part 2 မှာတော့ အားပေးမှုတွေအပြင် ဝေဖန်မှုတွေလည်းကျယ်ကျယ်လောင်လောင်ထွက်ပေါ်လာလာခဲ့ပါတယ်။

◼ Military, Sci-fi, Action, Thriller အမျိုးအစား Duty After School ရဲ့ ဇာတ်လမ်းသဘောကတော့ မိုးပေါ်ကနေပြုတ်ကျလာတဲ့ အမျိုးအမည်မသိသက်ရှိတွေရဲ့တိုက်ခိုက်မှုတွေကို ကိုရီးယားစစ်တပ်နဲ့ကျောင်းသားတွေပူးပေါင်းပြီး ပြန်လည်တိုက်ခိုက်ကြတဲ့အကြောင်းဖြစ်ပါတယ်။

◼ Duty After School မှာ နိုအယ်ဆော့အဖြစ်သရုပ်ဆောင်ခဲ့တဲ့ သရုပ်ဆောင် Lee Yeon ရဲ့ Instagram ပို့စ်တစ်ခုအရ Duty After School ဟာ နောက်ထပ် Part 3 ထွက်လာနိုင်တယ် ဆိုပြီး သတင်းထွက်လာပါတယ်။ လွန်ခဲ့တဲ့ငါးရက်ခန့်က Lee Yeon ဟာ Duty After School Part 3 ဆိုတဲ့ စာအုပ်အဖုံးပုံတစ်ခုကို ၎င်းရဲ့ Instagram story မှာ မျှဝေခဲ့တဲ့အတွက် ပရိသတ်တွေက Duty After School ဟာ Part 3 ထွက်လာနိုင်တယ် ဆိုပြီး ယူဆနေကြတာပါ။ 

◼ Duty After School Part 3 နဲ့ ပတ်သက်ပြီး ၎င်းရဲ့ထုတ်လုပ်ရေးကုမ္ပဏီ Studio Dragon နဲ့ TVING ရုပ်သံလိုင်းတို့ဘက်ကတော့ တစ်စုံတစ်ရာအတည်ပြုထားခြင်းမရှိသေးပါဘူး။

◼ Duty After School ကို Memories of the Alhambra, Sweet Home, Mr. Queen, Tale of the Nine Tailed, Abyss နဲ့ Kingdom တို့ကို ထုတ်လုပ်ခဲ့တဲ့ Studio Dragon ကုမ္ပဏီကနေ ထုတ်လုပ်ခဲ့တာဖြစ်ပြီး Shin Hyun-soo, Lee Soon-won, Im Se-mi, Kwon Eun-bin, Kim Ki-hae, Kim Min-chul, Kim Su-gyeom, Kim Jung-lan, Noh Jong-hyun, Moon Sang-min စတဲ့ သရုပ်ဆောင်များစွာပါဝင်ထားပါတယ်။

Ref: Lee Yeon Instagram 

Sub-Zero ရေးသည်။