Van Helsing reboot အကြောင်း ဒါရိုက်တာ Julius Avery ဘာပြောလာသလဲ

Van Helsing reboot အကြောင်း ဒါရိုက်တာ Julius Avery ဘာပြောလာသလဲ

ဧပြီ ၁၅၊ ၂၀၂၃။

◼ Universal Studios ဟာ ၂၀၂၁ ထုတ် Invisible Man Reboot အောင်မြင်သွားပြီးတဲ့နောက်မှာ ၎င်းတို့ပိုင် Monster ဇာတ်ကောင်တွေနဲ့ ဆက်စပ်ဇာတ်ကောင်တွေကို reboot ထုတ်လုပ်ဖို့အတွက် စတင်ပြင်ဆင်နေပြီဖြစ်ပါတယ်။

◼ Universal ရဲ့ Van Helsing ဇာတ်ကောင်ကိုလည်း reboot ချပြီး ပြန်လည်ထုတ်လုပ်ဖို့အတွက် ပြင်ဆင်နေကြပေမယ့်လည်း သုံးနှစ်ကြာသည်အထိ သတင်းတစ်စုံတစ်ရာထွက်ပေါ်လာခြင်းမရှိသေးပါဘူး။ သို့ပေမယ့် Van Helsing reboot ကို တာဝန်ယူထားရတဲ့ ဒါရိုက်တာ Julius Avery ကတော့ Van Helsing reboot ဟာ အမှန်တကယ်ထွက်လာမှာဖြစ်ပြီး ဇာတ်လမ်းပြင်ဆင်တည်ဆောက်နေကြောင်း အတည်ပြုပေးလာခဲ့ပါတယ်။

◼ Julius Avery ဟာ Fangoria ဝက်ဘ်ဆိုက်နဲ့အင်တာဗျူးတစ်ခုမှာ Van Helsing reboot ဟာ ဇာတ်လမ်းပြင်ဆင်တည်ဆောက်ဆဲအနေအထားမှာရှိနေကြောင်း အခုလိုမှတ်ချက်ပြုထားပါတယ်။

"စောနက ခင်ဗျား James Wan အကြောင်းပြောသွားသေးတယ်နော်။ ကျွန်တော်က သူနဲ့အလုပ်လုပ်ချင်နေတာကြာလှပြီ။ သူက သြစတေးလျသားလေဗျာ။ ပြီးကျ ဟုတ်တယ် ကျွန်တော်နဲ့သူနဲ့ Van Helsing ရုပ်ရှင်တစ်ကားအတူတူထုတ်ဖို့ရှိတယ်။ ကျွန်တော် ကိုယ်တိုင်ရေးပြီး ကိုယ်တိုင် ဒါရိုက်တာလုပ်မယ်၊ James က ထုတ်လုပ်သူလုပ်မယ်။ ဒီရုပ်ရှင်က အသက်ရှိနေပါသေးတယ်။ ခင်ဗျားတို့ကိုဒီလောက်ပဲပြောပြလို့ရမယ်။"

◼ အဆို​ပါအင်တာဗျူးအရ Van Helsing ရုပ်ရှင်သစ်ကို ဒါရိုက်တာ Julius Avery က ဇာတ်လမ်းကိုသာမက ဒါရိုက်တာပိုင်းကိုပါ တာဝန်ယူသွားမှာဖြစ်ပြီး Conjuring တွေရဲ့ထုတ်လုပ်သူ James Wan က ထုတ်လုပ်သူအဖြစ်တာဝန်ယူသွားမှာဖြစ်ကြောင်းသိရပါတယ်။

◼ Van Helsing ဟာ ဗန်ပိုင်းယားနဲ့မကောင်းဆိုးဝါးတွေကိုလိုက်လံရှင်းလင်းတဲ့မုဆိုးတစ်ယောက်ဖြစ်ပြီး ၂၀၀၄ မှာ The Mummy ဒါရိုက်တာ Stephen Sommers နဲ့ သရုပ်ဆောင် Hugh Jackman တို့နဲ့ ရုပ်ရှင်တစ်ကားထွက်ခဲ့ဖူးသလို ၂၀၁၆ ကနေ ၂၀၂၁ အထိ ပြသခဲ့တဲ့ TV Series တစ်ခုလည်းရှိခဲ့ဖူးပါသေးတယ်။

◼ ဒါရိုက်တာ Julius Avery ရဲ့ နောက်ထပ် horror ရုပ်ရှင်တစ်ကားဖြစ်တဲ့ သရုပ်ဆောင် Russell Crowe ရဲ့ The Pope's Exorcist ဟာ လက်ရှိမှာရုံတင်ပြသနေပါတယ်။

Ref: ComicBook

McGarrett ရေးသည်။