American Horror Story မှာ ပါဝင်ဖို့ သရုပ်ဆောင်သင်တန်းတက်နေတဲ့ Kim Kardashian

American Horror Story မှာ ပါဝင်ဖို့ သရုပ်ဆောင်သင်တန်းတက်နေတဲ့ Kim Kardashian

မေ ၃၊ ၂၀၂၃။

◼ အမေရိကန်နာမည်ကျော် social influencer တစ်ယောက်ဖြစ်တဲ့ Kim Kardashian ဟာ FX ရုပ်သံလိုင်းရဲ့ နာမည်ကျော် anthology horror ဇာတ်လမ်းတွဲတစ်ခုဖြစ်တဲ့ American Horror Story ရဲ့ Season 12 မှာ ပါဝင်သွားမှာဖြစ်ပါတယ်။

◼ Kim Kardashian ဟာ American Horror Story က သူ(မ) သရုပ်ဆောင်ရမယ့် ဇာတ်ဝင်ခန်းတွေမှာ ပီပြင် ပိုင်နိုင်စွာ သရုပ်ဆောင်နိုင်ဖို့အတွက် သရုပ်ဆောင်နည်းပြတစ်ဦး ခေါ်ယူပြီး အနီးကပ် သင်ကြား​ပြသမှုကို ခံယူနေတယ်လို့ သိရပါတယ်။

◼ Kim Kardashian ဟာ ထင်ရှားတဲ့ Social Influencer တစ်ဦးဖြစ်ပြီး မော်ဒယ်တစ်ယောက်အနေနဲ့ ရပ်တည်နေသလို စီးပွားရေးလုပ်ငန်းတွေကိုလည်း ဦးဆောင်နေတဲ့ အမျိုးသမီးတစ်ဦးလည်း ဖြစ်ပါတယ်။

◼ American Horror Story မှာ Kim Kardashian တစ်ယောက် ပါဝင်လာမယ်ဆိုတာကို ယခုနှစ် ဧပြီလကမှ ကြေညာထားတာဖြစ်ပြီး သူ(မ)အနေနဲ့ ဘယ်အခန်း ကဏ္ဍကနေ သရုပ်ဆောင်သွားမယ်ဆိုတာကိုတော့ သိထားရခြင်း မရှိသေးပါဘူး။ 

◼ လွန်ခဲ့တဲ့ရက်ပိုင်းကမှ ကျင်းပထားတဲ့ Met Gala 2023 ပွဲကို တက်ရောက်လာတဲ့ Kim Kardashian ကို Variety က အင်တာဗျူးတဲ့အခါမှာတော့ နောက်လကနေစပြီး သူ(မ) ဇာတ်ကောင်ရဲ့ ရိုက်ကူးရေး စတော့မှာဖြစ်ပြီး ဒီအတွက်ကြောင့် ရိုက်ကူးရေးသင်တန်း တက်နေတယ်လို့ ဖြေကြားခဲ့ပါတယ်။

◼ ဆက်လက်ပြီး Kim က သူ(မ) သရုပ်ဆောင်ရမယ့် ဇာတ်ကောင်အကြောင်းကိုတော့ ပြောပြလို့မရသေးကြောင်း၊ အသစ်အဆန်းတစ်ခု လုပ်ရတော့မှာကြောင့် စိတ်လှုပ်ရှားနေရတဲ့အကြောင်းနဲ့ Comfort Zone ကနေ ရုန်းထွက်နိုင်တော့မယ်ဆိုတာကိုပါ ထပ်လောင်း ပြောကြားခဲ့ပါသေးတယ်။

◼ American Horror Story ဟာ ၂၀၁၁ ခုနှစ်ကနေ FX မှာ စတင်ထုတ်လွှင့်ခဲ့တာဖြစ်ပြီး မတူထူးခြားတဲ့ ဇာတ်လမ်းဇာတ်ကွက်တွေနဲ့ သရုပ်ဆောင်တို့ရဲ့ ကျွမ်းကျင်မှုကြောင့် ကနဦး ပြသချိန်ကတည်းကနေ ယနေ့အချိန်ထိ အစဥ်တစိုက် အားပေးကြသူ အများအပြားရှိခဲ့တာကြောင့် ဒီ Series ဟာ Season 12 ထိတောင် ရောက်လာခဲ့တာလည်း ဖြစ်ပါတယ်။

Ref: Variety

Loki ရေးသည်။