Game of Thrones က Red Wedding ဇာတ်ဝင်ခန်းကြောင့် ငိုခဲ့ရတယ်ဆိုတဲ့ သရုပ်ဆောင် Richard Madden

Game of Thrones က Red Wedding ဇာတ်ဝင်ခန်းကြောင့် ငိုခဲ့ရတယ်ဆိုတဲ့ သရုပ်ဆောင် Richard Madden

မေ ၆၊ ၂၀၂၃။

◼ HBO ရဲ့ Game of Thrones ဇာတ်လမ်းတွဲက Red Wedding ဇာတ်ဝင်ခန်းဟာ Game of Thrones ပရိသတ်တွေကို ရက်ရက်စက်စက်ရင်ခွဲပစ်ခဲ့တဲ့ ဇာတ်ဝင်ခန်းတစ်ခုဖြစ်ပါတယ်။

◼ Game of Thrones မှာ Robb Stark အဖြစ် သရုပ်ဆောင်ခဲ့တဲ့ Richard Madden ကလည်း Red Wedding ဇာတ်ဝင်ခန်းကြောင့် ၎င်းကိုယ်တိုင်လည်းစိတ်ထိခိုက်ရသလို ငိုပါငိုခဲ့ရတယ်လို့ မှတ်ချက်ပြုခဲ့ပါတယ်။

◼ Richard Madden က ၎င်းပါဝင်ထားတဲ့ Citadel ဇာတ်လမ်းတွဲရဲ့အကြိုပြသပွဲအင်တာဗျူးတစ်ခုမှာ Red Wedding နဲ့ ပတ်သက်ပြီး အခုလိုမှတ်ချက်ပေးလာပါတယ်။

"ကျွန်တော်အကြာကြီးငိုခဲ့မိတယ်ဗျ၊ ဘာလို့ဆို အဲဒီအခန်းပြီးသွားလို့ရှိရင် ငါးနှစ်လောက်အတူတူရှိနေခဲ့တဲ့ ကျွန်တော့်မိသားစုနဲ့ကျွန်တော်ခွဲရတော့မှာလေ။ ဖန်သားပြင်ပေါ်ကအမေ၊ မိန်းမနဲ့ ဒီအဖွဲ့သားတွေနဲ့ အချိန်အကြာကြီးရှိခဲ့ကြတယ်၊ ဆက်မရိုက်ရတော့လို့မဟုတ်ပဲ ဒီမိသားစုနဲ့ခွဲရတော့မှာမို့လို့ငိုမိတာပါ။"

◼ Game of Thrones ရဲ့ spin-off ဇာတ်လမ်းတွဲ House of the Dragon နဲ့ ပတ်သက်ပြီး Richard Madden က ၎င်းအနေနဲ့ ကြည့်ရှုဖို့အစီအစဥ်ရှိကြောင်း ပြောခဲ့ပါသေးတယ်။

◼ Game of Thrones ဟာ အလှည့်အပြောင်းအချိုးအကွေ့ရက်စက်တဲ့ဇာတ်လမ်းတွဲတစ်ခုဖြစ်ပြီး Red Wedding ဇာတ်ဝင်ခန်းပါဝင်တဲ့ Season 3 က The Rains of Castamere အပိုင်းဟာ ပရိသတ်တွေကိုစိတ်ထိခိုက်မှုများစွာပေးခဲ့ကြောင်း အင်တာနက်ပေါ်က reaction ဗွီဒီယိုများအရ သိရှိရပါတယ်။

◼ HBO ဟာ House of the Dragon အပြင် A Knight of Seven Kingdoms: The Hedge Knight ဆိုတဲ့ Game of Thrones prequel spin-off series တစ်ခုကိုလည်း ထပ်မံထုတ်လုပ်သွားဦးမှာဖြစ်ပါတယ်။

Ref: Variety

McGarrett ရေးသည်။