Peter Pan And Wendy အတွက် Jude Law ဘယ်လိုပြင်ဆင်ခဲ့ရလဲ

Peter Pan And Wendy အတွက် Jude Law ဘယ်လိုပြင်ဆင်ခဲ့ရလဲ

မေ ၂၊ ၂၀၂၃။

◼ မကြာသေးခင်ကထွက်ရှိလာတဲ့ Disney ရဲ့ Peter Pan and Wendy Live-Action မှာ ဗီလိန်ဇာတ်ကောင်ဖြစ်တဲ့ Captain Hook အဖြစ် ပါဝင်ခဲ့တဲ့ သရုပ်ဆောင် Jude Law ဟာ Captain Hook ဇာတ်ကောင်အတွက် ပြင်ဆင်ခဲ့ရပုံတချို့ကိုပြောပြလာပါတယ်။

◼ Jude Law ဟာ Peter Pan And Wendy ရဲ့ရိုက်​ကူးရေးလုပ်နေတဲ့ ဘယ်အချိန်မဆို Jude Law အနေနဲ့မနေခဲ့ရပဲ Captain Hook ရဲ့ ဇာတ်ကောင် စရိုက်အတိုင်းအချိန်ပြည့်နေခဲ့ရကြောင်း talk show တစ်ခုဖြစ်တဲ့ The Tonight Show with Jimmy Fallon မှာ ပြောပြလာခဲ့ပါတယ်။

◼ Captain Hook ရဲ့ ပုံစံအတိုင်းအချိန်ပြည့်နေခဲ့ရတဲ့ဒီအစီအစဥ်က ဒါရိုက်တာဖြစ်သူ David Lowery ရဲ့ အကြံအစည်ဖြစ်ပြီး ကလေးသရုပ်ဆောင်တွေအနေနဲ့ Captain Hook ကို တကယ်ကြောက်ရွံ့နေတယ်ဆိုတာကို သေချာပြသချင်တဲ့အတွက် Jude Law အနေနဲ့ ဒီရုပ်ရှင် ရိုက်ကူးရေးအစကနေ အဆုံးသတ်ချိန်အထိ သူ့ရဲ့ ပုံစံအစစ်ကို မပြဖို့ စည်းကမ်းချက်ထုတ်ခဲ့တာပါ။

"ဒါကြောင့်မို့ ကျွန်တော်က တစ်ချိန်လုံး Hook ပုံစံနဲ့ နေရတယ်။ တကယ်ကြောက်ဖို့ကောင်းပြီး ရိုင်းစိုင်းတဲ့သူအ​ဖြစ်ပေါ့။" လို့ Jude Law က ပြောခဲ့တာပါ။

◼ Captain Hook ဟာ ကြောက်စရာဇာတ်ကောင်တစ်ခုဖြစ်တဲ့အတွက် Jude Law ဟာ Captain Hook ရဲ့ စိတ်နေသဘောထားအတိုင်း ကလေးသရုပ်ဆောင်တွေကိုပြုမူဆက်ဆံရတဲ့အတွက် ကလေးသရုပ်ဆောင်တွေက Jude Law ကို ကြောက်လန့်ခဲ့ကြပါတယ်။

◼ သို့ပေမယ့်လည်း နောက်ဆုံးမှာတော့ Jude Law ဟာ "Peter Pan and Wendy" ရုပ်ရှင်ရဲ့ ရိုက်ကူးရေး နောက်ဆုံးရက်မှာ ရေခဲမုန့်ကားတစ်စီးကိုငှားရမ်းကာ အဲဒီကားကို သူကိုယ်တိုင် ရိုက်ကွင်းရှိရာနေရာကို မောင်းသွားခဲ့ပြီး ကလေးသရုပ်ဆောင်တွေကို ချောကလက်ရေခဲမုန့် ကျွေးခဲ့ပြီး ချော့ခဲ့ရတယ်လို့ သိရပါတယ်။

◼ လက်ရှိမှာ "Peter Pan and Wendy" ရုပ်ရှင်ကို Disney+ မှာ ကြည့်ရှုနိုင်ပြီ ဖြစ်ပါတယ်။

Loki ရေးသည်။