Superman: Legacy က Lois Lane နေရာအတွက် သရုပ်ဆောင်သုံးဦးထင်ကြေးပေးခံနေရ

ပုံစာ (ဝဲမှယာ) - Lois Lane နေရာအတွက် လျာထားခံရသူများ (Samara Weaving, Emma Mackey, Rachel Brosnahan)

Superman: Legacy က Lois Lane နေရာအတွက် သရုပ်ဆောင်သုံးဦးထင်ကြေးပေးခံနေရ

မေ ၁၄၊ ၂၀၂၃။

◼ Marvel ရုပ်ရှင် Guardians of the Galaxy ဟာ အောင်မြင်မှုတွေရရှိခဲ့ပြီးနောက်မှာ ဒါရိုက်တာ James Gunn ဟာ Superman: Legacy အပေါ် ပြင်ဆင်မှုတွေဆက်လက်လုပ်ဆောင်နေပြီဖြစ်ပါတယ်။

◼ Superman: Legacy မှာ ပါဝင်ဖို့လျာထားခံရတဲ့သရုပ်ဆောင်တွေရဲ့ audition ဗွီဒီယိုတွေဟာ ပြီးခဲ့တဲ့ရက်သတ္တပတ်တွေအထိ James Gunn ဆီကို ရောက်ရှိနေပြီဖြစ်ပြီး အဲဒီထဲကမှ Superman aka Clark Kent, Lois Lane နဲ့ Lex Luthor နေရာတွေအတွက် စတင်ရွေးချယ်နေပြီဖြစ်ပါတယ်။

◼ Deadline သတင်းရဲ့ ဆောင်းပါးတစ်ပုဒ်အရ Superman aka Clark Kent နေရာအတွက် Nicholas Hoult, David Corenswet, Jacob Elordi နဲ့ Andrew Richardson တို့ဟာ ထိပ်ဆုံးကနေမျက်စိကျခံနေရကြောင်းသိရပါတယ်။ 

◼ အဆိုပါဆောင်းပါးအရ Ready or Not နဲ့ Babysitter သရုပ်ဆောင် Samara Weaving, Sex Education နဲ့ Barbie သရုပ်ဆောင် Emma Mackey နဲ့ Spies in Disguise အသံသရုပ်ဆောင် Rachel Brosnahan တို့ဟာ Superman ရဲ့ ချစ်သူ ဂျာနယ်လစ် Lois Lane နေရာအတွက် အဓိကထားလေ့လာခံနေရတယ်လို့သိရပါတယ်။ Audition tape တွေကို ပြီးခဲ့တဲ့ မေ ၄ ရက်နေ့အထိ နောက်ဆုံးလက်ခံခဲ့တာဖြစ်ပြီး James Gunn ဟာ အဲဒီ tape တွေကို ကြည့်ရှုစစ်ဆေးကာ လာမယ့်နှစ်လအတွင်းမှာ Superman, Lois Lane နဲ့ Lex Luthor နေရာတွေကို ရွေးချယ်သွားနိုင်ကြောင်း ဟောလိဝုဒ်အတွင်းသတင်းပေးများက မှတ်ချက်ပြုထားပါသေးတယ်။ ယခင် DCEU ရဲ့ Man of Steel နဲ့ Snyder Cut တွေမှာတော့ သရုပ်ဆောင် Amy Adams က Lois Lane အဖြစ် သရုပ်ဆောင်ခဲ့ပါတယ်။ 

◼ Lex Luthor နေရာအတွက် James Gunn ဟာ A အဆင့် သရုပ်ဆောင်များစွာကိုလျာထားပါတယ်။ လက်ရှိမှာ Superman: Legacy အတွက် Apex ဆိုတဲ့နေရာအတွက် audition ပြုလုပ်နေကြောင်းသိရကာ Apex Lex Luthor ဖြစ်လာနိုင်တယ်လို့လည်းသိရပါတယ်။

◼ အထက်ဖော်ပြပါအကြောင်းအရာကို သရုပ်ဆောင်တွေနဲ့ ဒါရိုက်တာ James Gunn အပါအဝင် Superman: Legacy ရဲ့ တခြားတာဝန်ရှိသူတွေဘက်က တစ်စုံတစ်ရာအတည်ပြုခြင်းမရှိသေးပါဘူး။

◼ Superman: Legacy ဟာ ဇူလိုင် ၁၁၊ ၂၀၂၅ မှာ ရုံတင်ပြသမှာပါ။

Ref: Deadline

Sub-Zero ရေးသည်။