The Lord of the Rings: The Rings of Power ရဲ့ Season 2 အကြောင်း နောက်ဆုံးရသတင်းများ
မေ ၉၊ ၂၀၂၃။
◼ ပြီးခဲ့တဲ့နှစ်ကထွက်ရှိခဲ့တဲ့ Amazon Prime ရဲ့ Lord of the Rings ဇာတ်လမ်းတွဲ The Lord of the Rings: The Rings of Power ဟာ Middle-Earth ပရိသတ်တွေအကြားမှာ အထိုက်အလျောက်အားပေးမှုတချို့ရရှိခဲ့ပါတယ်။
◼ Amazon ဟာ The Lord of the Rings: The Rings of Power ကို Season ငါးခုစာအထိထုတ်လုပ်ဖို့ရည်ရွယ်ထားကြောင်းသိရပါတယ်။ သို့ပေမယ့် Season 1 မှာတော့ ပရိသတ်ရဲ့တုံ့ပြန်မှုတွေမှာ အဆိုးဝေဖန်မှုတွေပါဝင်လာတာကိုလည်း ထူးခြားစွာတွေ့ခဲ့ရပါတယ်။
◼ The Lord of the Rings: The Rings of Power ဟာ စာရေးဆရာကြီး J. R. R. Tolkien ရဲ့ Lord of the Rings Universe မှာရှိတဲ့ ခေတ်လေးခေတ်ထဲက ဒုတိယခေတ်ကိုဇာတ်အိမ်ယူထားတာဖြစ်ပြီး Elf တွေ၊ Dwarf တွေ၊ Numenor သမိုင်းကြောင်းများစွာအပြင် Lord of the Rings ရဲ့ အဓိကရန်သူတော်ကြီး Sauron ရဲ့ အကြောင်းတွေကိုလည်းတွေ့ရမှာပါ။
◼ The Lord of the Rings: The Rings of Power ဟာ နောက်ထပ် Season 2 ထွက်ရှိမှာဖြစ်ပြီး လက်ရှိမှာ Season 2 ကို နယူးဇီလန်နိုင်ငံနဲ့ ယူကေနိုင်ငံမှာ ရိုက်ကူးရေးပြုလုပ်နေလျက်ရှိပါတယ်။ Season 2 ဟာလည်း Season 1 လိုမျိုး အပိုင်း ၈ ပိုင်းပါဝင်သွားမှာဖြစ်ပြီး ရိုက်ကူးရေးသတင်းတွေအရ တချို့ဇာတ်ဝင်ခန်းတွေဟာ ရုပ်ရှင်အဆင့်ခမ်းနားမှုပုံစံဖြစ်အောင်အထိဖန်တီးထားကြောင်းသိရပါတယ်။
◼ The Lord of the Rings: The Rings of Power မှာ ပါဝင်ခဲ့တဲ့ Orc ခေါင်းဆောင် Adar ဇာတ်ကောင်နေရာကိုလည်း သရုပ်ဆောင်အပြောင်းအလဲပြုလုပ်ခဲ့ပါတယ်။ Season 1 မှာ Adar နေရာကို Joseph Mawle က သရုပ်ဆောင်ခဲ့ပေမယ့်လည်း Season 2 မှာတော့ Sam Hazeldine က ဆက်လက်သရုပ်ဆောင်သွားမှာပါ။
◼ Season 1 အဆုံးသတ်မှာ LOTR ယူနီဗာ့စ်ရဲ့ အဓိကလက်စွပ်တွေထဲက Elf တွေ ဝတ်ဆင်ကြတဲ့ လက်စွပ်သုံးကွင်းဖြစ်တဲ့ Narya, Nenya နဲ့ Virya တို့ကိုပြသသွားခဲ့ပါတယ်။ The Lord of the Rings: The Rings of Power မှာ Galadriel အဖြစ် သရုပ်ဆောင်ထားတဲ့ Morfydd Clark ရဲ့ FYC ပွဲတော်မှာ အတည်ပြုချက်အရ Season 2 မှာ Galadriel နဲ့ ၎င်းဝတ်ဆင်မယ့် Nenya လက်စွပ်တို့ကြားက သဟဇာတဖြစ်မှုတွေနဲ့ အပေးအယူမျှပုံတွေကို ပိုမိုတွေ့မြင်ရမှာဖြစ်ကြောင်း သိရှိရပါတယ်။ LOTR မှာ Elf တွေက လက်စွပ်သုံးကွင်း၊ Dwarf တွေက လက်စွပ်ခုနစ်ကွင်း၊ လူသားတွေက လက်စွပ်ကိုးကွင်းနဲ့ Sauron ကတော့ လက်စွပ်တစ်ကွင်း အသီးသီးရှိခဲ့ကြပါတယ်။
◼ ဒါ့အပြင် Fellowship of Fans ဆိုတဲ့ ဝက်ဘ်ဆိုက်ရဲ့ဆောင်းပါးတစ်ပုဒ်အရ The Lord of the Rings: The Rings of Power ရဲ့ Season 2 မှာ မူရင်းဝတ္ထုနဲ့ LOTR သုံးကားတွဲမှာပါဝင်ခဲ့တဲ့ ပင့်ကူကြီး Shelob ရဲ့ ငယ်ဘဝကိုလည်း မြင်တွေ့ရဖွယ်ရှိကြောင်းသိရပါတယ်။ Shelob ဟာ Season 2 မှာ ပါဝင်ပေမယ့်လည်း ၎င်းပါဝင်မယ့်အခန်းအရေအတွက်ဟာ နည်းပါးနိုင်ကြောင်း အဆိုပါဝက်ဘ်ဆိုက်အရသိရပါသေးတယ်။ ဒီအကြောင်းအရာကို Amazon ဘက်ကတော့ တစ်စုံတစ်ရာမှတ်ချက်ပြုခြင်းမရှိသေးပါဘူး။
◼ LOTR အရ Shelob ဟာ ကမ္ဘာဦးပင့်ကူကြီး Ungoliant ရဲ့ မျိုးဆက်ဖြစ်ပြီး Mordor ကို သွားရာလမ်း Cirith Ungol က သားရဲတွင်းတစ်ခုမှာနေထိုင်ပါတယ်။ Shelob ကို Sauron က အသိအမှတ်ပြုကာ အစောင့်ရာထူးကိုလည်းပေးခဲ့ပါတယ်။ ဒါရိုက်တာ Peter Jackson ရဲ့ တတိယခေတ်အခြေခံ Lord of the Rings သုံးကားတွဲမှာ Shelob ကို ပြသခဲ့ပြီး Frodo နဲ့ Sam တို့ကိုလည်း Shelob က သတ်ဖြတ်စားသောက်ဖို့ကြိုးပမ်းခဲ့ပါသေးတယ်။
◼ ပရိသတ်တွေအနေနဲ့ The Lord of the Rings: The Rings of Power ရဲ့ Season 2 ကို လာမယ့် ၂၀၂၄ နွေဦးရာသီမှာမှ ကြည့်ရှုရဖွယ်ရှိပါတယ်။
McGarrett ရေးသည်။
0 Comments